Copy Url

धोनी फिट, चेन्नाई हिट, दिल्लीमाथि ८० रनको जित

धोनी फिट, चेन्नाई हिट, दिल्लीमाथि ८० रनको जित

चेन्नाई सुपर किंग्स इंन्डियन प्रिमियर लिग (आईपीएल) क्रिकेटको पहिलो क्वालिफायरमा पुग्न सफल भएको छ ।

घरेलु मैदानमा भएको खेलमा शीर्ष स्थानको दिल्ली क्यापिटल्सलाई ८० रनको फराकिलो अन्तरले पराजित गर्दै चेन्नाई पहिलो क्यालिफायरमा प्रवेश गरेको हो ।

१८० रनको चुनौती पछ्याउँदै ब्याटिङ गरेको दिल्लीले १६.२ ओभरमा सबै विकेटको क्षतिमा ९९ रन मात्रै बनाउन सक्यो । कप्तान श्रेयस ऐरले ४४ र शिखर धवनले १९ रन बनाए पनि अन्य कुनै ब्याट्सम्यानले दोहोरो अंक पनि बनाउन सकेनन् ।

पहिलो ओभरको पाँचौं बलमा नै ४ रन हुँदा पृथ्वी शालाई गुमाएको दिल्लीका लागि शिखर धवन र कप्तान श्रेयस ऐरले ४८ रनको साझेदारी गर्दै टिमलाई उकास्ने प्रयास गरेका थिए । तर ५.३ ओभरमा ५२ रन हुदा दोस्रो विकेटको रुपमा धवन आउट भएपछि दिल्लीको विकेट पतन सुरु भएको थियो ।

दिल्लीलाई सस्तैमा समेट्ने क्रममा चेन्नाईका दुई जना बलरले उत्कृष्ट प्रदर्शन गरे । इमरान ताहिरले ४ विकेट लिए । उनले ३.२ ओभरमा मात्र १२ रन खर्चिएर ४ विकेट लिएका थिए । त्यस्तै, रविन्द्र जडेजाले तीन ओभर बलिङ गर्दै तीन विकेट लिए ।

यसअघि टस हारेर पहिले ब्याटिङ गरेको चेन्नाईले निर्धारित २० ओभरमा चार विकेटको क्षतिमा १७९ रन बनाएको थियो । चेन्नाईका लागि सुरेश रैनाले ३७ बलमा ५९ रन बनाए । त्यस्तै, कप्तान महेन्द्रसिंह धोनीले अविजित ४४, फाफ् डु प्लेसिसले ३९ र रविन्द्र जडेजाले २५ रन बनाएका थिए ।

अघिल्लो म्याचमा ज्वरो आएका कारण धोनी मैदानमा उत्रिएका थिएनन् । तर दिल्लीविरुद्धको खेलमा धोनी आएपछि टिमको ज्यान आएसरह भयो । मोरिसको ओभरको सामना धोनीले गरिरहेका थिए ।

मोरिसको एक बल बीमरको रुपमा धोनीको ब्याटमा पुग्यो । तर धोनीले कमालको टाइमिङ देखाउँदै त्यसलाई छक्का प्रहार गरिदिए । तर, अम्पायरले यसलाई ‘नो बल’ दिए । त्यसपछि मोरिस आफैं धोनीकहाँ पुगेर हात मिलाउँदै माफी मागे ।

बीमर क्रिकेटमा यस्तो बल मानिन्छ जसबाट ब्याट्सम्यानलाई चोट लाग्ने खतरा हुन्छ । यद्यपि धोनीले त्यसको गज्जबले सामना गरेका थिए ।

यसैगरी ट्रेन्ट बोल्टको एक बललाई धोनीले आफ्नो चिर परिचित हेलिकोप्टर सट लगाउँदै चौका प्रहार गरे । धोनी म्यान अफ द म्याच भए ।

दिल्लीविरुद्धको खेलमा जित हात पारेसँगै चेन्नाईले १३ खेलबाट ९ खेलमा जित, चार खेलमा हार ब्यहोर्दै १८ अंक बनाएर पहिलो क्वालिफायरमा प्रवेश गरेको हो । अब उसले फाइनल प्रवेशका लागि पहिलो क्वालिफायरमा प्रतिस्पर्धा गर्नेछ ।

यता, दिल्लीको लागि अझै पहिलो क्वालिफायरमा पुग्ने मौका छ । पहिलो क्वालिफायरमा नपुगेपनि दिल्लीले प्लेअफको इलिमिनेटर राउण्डमा प्रतिस्पर्धा गर्नेछ । दिल्लीको अब अन्तिम खेल बाँकी छ । दिल्लीको १३ खेलबाट ८ खेलमा जित र पाँच खेलमा हारसहित १६ अंक छ ।

nepalinepse

Leave a Reply

Your email address will not be published. Required fields are marked *

WP2Social Auto Publish Powered By : XYZScripts.com