एनसीसी बैंकविरुद्ध परेका सबै मुद्धा खारेज, बोनस सेयरबाटै पूँजी पुर्याउने तयारी

एनसीसी बैंकविरुद्ध परेका सबै मुद्धा खारेज, बोनस सेयरबाटै पूँजी पुर्याउने तयारी

मुद्धै मुद्धाको चाङले लाभांशको विषयमा लामो समयदेखि अनिर्णित नेपाल क्रेडिट एण्ड कमर्स(एनसीसी) बैंकको आगामी बाटो केही सहज हुने देखिएको छ ।

बैंकले चालु आर्थिक वर्षको तेश्रो त्रैमासमा अघिल्लो वर्षको सोही अवधिको तुलनामा अधिकांश सूचकमा निकै राम्रो प्रगति गरी नाफा समेत १ अर्ब १६ करोड भन्दा बढी आर्जन गरेर आफूलाई सुधारको बाटोमा अगाडि बढाएको बैंकलाई लाभांश वितरण तथा अन्य महत्वपूर्ण निर्णय गर्ने बाटो खुल्ने गरी पाटन उच्च अदालतले मंगलबार आदेश दिएको छ । 

चारवटा विकास बैंकलाई गाभेर अगाडि बढेको एनसीसी बैंकविरुद्ध सोही बैंकको संस्थापक सेयर होल्डरको रुपमा रहेको एनबी ग्रुपले लाभांश घोषणामा रोक लगाउनुपर्ने, एपेक्स डेभलपमेन्ट बैंकसँगको मर्जर सम्झौता खारेज हुनुपर्ने लगायतका ६ वटा मुद्धा दायर गरेको थियो । 

एनसीसीविरुद्ध परेका ६ वटै मुद्धा पाटन उच्च अदालतले खारेज गरिदिएको हो । 

उच्च अदालतका मुख्य न्यायाधीश कुमार चूँडाल र न्यायाधीश टेकप्रसाद ढुंगानाको संयुक्त इजलासले एनबी ग्रुपसँग सम्बद्ध एनबी ग्रुप नेपाल प्रालि, एनबी इन्भेष्टमेन्ट प्रालि, एनबी मार्केट प्रालि, जेनिथ इन्भेष्टमेन्ट एण्ड सेक्युरिटिज प्रालि र सांग्रीला इन्भेष्टमेन्ट प्रालिबाट दायर सबै मुद्धा खारेजीको फैसला सुनाएको हो । 

यो फैसलासँगै मुद्धाहरुको चाङका कारण आर्थिक वर्ष ०७२ ७३ देखि नै लाभांश वितरण गर्न नसकेको बैंकलाई लाभांश सम्बन्धी निर्णय गर्न सहज भएको छ ।  हालै मात्र ५० प्रतिशत हकप्रद बिक्री गरी ७ अर्ब १ करोड ८५ लाख चुक्तापूँजी पुर्याएको यो बैंकले कम्तीमा १ अर्ब बराबरको बोनस सेयर वितरण गर्नेछ । 

कुनै बेला समस्याग्रस्त बनेको एनसीसी बैंकमा केही समयसम्म राष्ट्रबैंकले व्यवस्थापन सम्हालेको थियो । 

केन्द्रीय बैंकबाट लक्ष्मीप्रपन्न निरौला(हाल प्रवक्ता)को नेतृत्वको टिमले समस्याग्रस्त एनसीसी बैंकको व्यवस्थापन सुधारेर एपेक्स डेभलपमेन्ट बैंक, इन्फ्रास्टक्चर डेभलपमेन्ट बैंक, सुप्रिम डेभलपमेन्ट बैंक र इन्टरनेशनल डेभलपमेन्ट बैंकलाई एनसीसीमा बिलय गराई बैंकलाई व्यवस्थापन जिम्मा लगाएको थियो । 

एपेक्स डेभलपमेन्ट बैंकको तत्कालीन टिमले कर्जा प्रवाह गर्दा घोटाला गरेका र धेरै फट्याई गरेका भन्दै एनबी ग्रुपले यो बैंकसँग डिमर्ज नै हुनुपर्ने माग उठाउँदै आएको थियो । उसका अन्य माग समेत बैंकलाई अगाडि बढ्न नदिने खालका थिए । 

अदालतको फैसलापछि अब लाभांश वितरणसँगै थाँती रहेका अन्य महत्वपूर्ण निर्णय गर्ने बाटो समेत खोलिएको बैंकको उच्च व्यवस्थापनले जनाएको छ । 

मंगलबार राति बिजशालासँग कुरा गर्दै बैंकका एक उच्च अधिकारीले भने–‘अब बोनस सेयरबाटै तोकिएको ८ अर्ब पूँजी पुर्याउन हामीलाई सहज भएको छ । बैंक अब अझै तीव्र गतिमा दौडिन्छ ।’ 

nepalinepse

Leave a Reply

Your email address will not be published. Required fields are marked *

WP2Social Auto Publish Powered By : XYZScripts.com